ՌԴ-ում քրեական գործ է հարուցվել՝ Հայաստանի տարածքում Մի-24 ուղղաթիռի խոցման դեպքի առիթով

Ռուսաստանի ռազմական քննիչները քրեական գործ են հարուցել Հայաստանի և Ադրբեջանի սահմանին ռազմական Մի-24 ուղղաթիռի կործանման դեպքի առիթով։ Այս մասին հաղորդում է Interfax գործակալությունը՝ հղում անելով իր աղբյուրին։

«Քրեական գործը հարուցվել է ՌԴ Քրեական օրենսգրքի 351-րդ հոդվածով (թռիչքների կամ դրանց նախապատրաստման կանոնների խախտում)», – ասել է գործակալության զրուցակիցը:

Աղբյուրը հստակեցրել է, որ ներկայումս Ռուսաստանի ռազմական քննիչները Հայաստանի և Ադրբեջանի իրենց գործընկերների հետ միասին «նախնական քննչական գործողություններ են իրականացնում»: Նրանք զննել են դեպքի վայրը, նշանակել են մի քանի փորձաքննություններ, այդ թվում՝ թռիչքային-տեխնիկական:

Աղբյուրը նաև պարզաբանել է, որ «գործի քննության ընթացքում, ամենայն հավանականությամբ, այն կվերաորակվի ավելի լուրջ գործի»:

Ռուսաստանի Դաշնության Քրեական օրենսգրքի 351-րդ հոդվածը նախատեսում է պատիժ՝ մինչև 7 տարի ժամկետով ազատազրկմամբ:

Քննությունը վարում են Գյումրիում տեղակայված ռուսական ռազմաբազայի ռազմական քննիչները։

Հիշեցնենք՝ ՌԴ Մի-24 ուղղաթիռը խոցվել էր Ադրբեջանի զինված ուժերի կողմից նոյեմբերի 9-ին, Հայաստանի օդային տարածքում՝ Երասխ գյուղի մոտակայքում։ Ուղղաթիռի կործանման հետևանքով մահացել էր անձնակազմի 2 անդամ, 1-ը վիրավորվել էր։ Ադրբեջանը ներողություն էր խնդրել տեղի ունեցածի համար՝ խոստանալով ֆինանսական փոխհատուցում։

Добавить комментарий

Ваш адрес email не будет опубликован. Обязательные поля помечены *

You may have missed